Anno 1633. den 20. Ocobr. ist diser Orth / in deß Hertzogs Bernhardts zu Sachsen / Weymar / Namen / vom Obersten Tupadel erstigen / vnd außgeplündert worden. Anno 34; im Jun. kam er / mit schlechtem Accord / durch Vbergab deß Obristen Fritz Ros / wider an Bäyern.
Von Theils Kemnat genandt / ein OberPfältzisch Stättlein / vff dem Weg von Nürenberg nach Eger / vnd von dieser letzten Statt bey fünff guter Meylen gelegen / so die Sächsische-Weinmarische Anno 1634. den 2. Martij eingenommen / vnd im Jan. Anno 1641. die Schwedische die Bäyrische Guarnision allda auffgeschlagen / vnd verjagt haben. Im Jahr 1648. hat sich solches dem Schwedischen Generaln von Königsmarck ergeben.
Ein Dorff / auff der Strassen von Augspurg / nach Mönchen gelegen / vnd den Jesuitern zu Augspurg gehörig / so die verbundene KriegsVölcker Anno 1648. eingeäschert haben.
Ein Fürstlich Bäyerische Statt / an der Iser / vnterhalb Dingelfingen / in NiederBäyern / Anno 1224. von Hertzog Ludwigen in Bäyern / der Anno 1231. gestorben / erbawet / wie Andreas Ratisponensis in seiner Bäyrischen Chronick / am 66. Blat / schreibet. Gehört in die Regierung vnnd RentAmpt Landshut; vnnd hat ein Landgericht / darein die Märckte Enchendorff vnd Simbach / neben sechs Schlössern / sechs Adelichen Sitzen / 19. Hoffmarchen / ohne die Dörffer / vnd andere Güter / gehören. Die Pfarrkirchen zu vnser Lieben Frawen / haben Käyser Ludwigs deß Vierdten Söhne Anno 1348. dem Abbt vnd Convent deß Closter / OberAltAich an der Thonaw / mit allen ihren Zugehörungen / Nutzen vnd Rechten / zu eygen / vnd ewiglichen zu haben / vnd zu nutzen vbergeben / wie in tom. 2. Metrop. Salisb. fol. 53. stehet.
Dieses ist ein berühmbte / vnd die andere / vnd zwar vornembste Hauptstatt in NiederBäyern / allda ein Fürstliche Bäyerische Regierung vnnd RentAmpt / dabey sich befinden Vicedom / Cantzler / Räthe / Obrist Forstmeister / Rentmeister / Castner / Ober- vnd VnterRichter / Zöllner / Rentschreiber / Castengegenschreiber / Zollgegenschreiber; von welchen die vntergebene Landgericht / vnd deren Beampte / gubernirt werden / vnd befinden sich bey jedem deren Pfleger / oder deren Verwalter / zum Theil LandRichter / Gerichtschreiber / Castner / Mautner / Zöllner / vnnd deren Gegenschreiber / etc. vnnd gehören hieher die folgende Landgericht / Erding / sampt der Statt / Mospurg / sampt der Statt / Wolnzach / Ratzenhofen / Rotenburg / Kirchberg / Eckmill / Deispach / Dingelfing / sampt der Statt dises Namens / Reispach / Landaw / sampt der Statt / Osterhoven / sampt der Statt / Natternberg / Vilshofen / sampt der Statt / die Graffschafft Hals / Griespach / Pfarrkirchen / Eckenfelden / Ganckhofen / Dorffen / Newmarckt / Vilsbiburg / Geisenhausen; vnnd neben den erzehlten sieben Stättlein / auch viel Märckt / als Wartenberg / Nandelstatt / Wolnzach / Rotenburg / Pfeffenhausen / Geißlhoring / Pfaffenberg / Eckmill / Teispach / Frantenhausen / Ergoldtspach / Pilsting / Reispach / Enchendorff / Simbach / Pladling / Plainting / Hals / Griespach Münster / Köstlern / PfarrKirchen / Trifftern / Eggenfelden / Wurmansquick / Gänckhofen / Masting / Dorffen / Newmarckt / Vilsbiburg / Felden / Ebersbaind / Geisenhausen: Item vierzehn Clöster / vier vnd siebentzig Schlösser / ein hundert sechs vnnd viertzig Adelische Sitz / 325. Hoffmarchen; neben einer grossen Anzahl Landgerichtlicher Dörffer / Ainsichtiger Höff / vnd dergleichen Güter. Es ligt Landshut am Wasser Isar; welche Hertzog Otto in Bäyern / der erste auß dem Wittelspachischen Stammen / nach dem Regenspurg ein Freystatt worden / an dem eintzlichsten vnnd lustigsten Orth / fast mitten in Bäyern /
Matthäus Merian: Topographia Bavariae. Frankfurter Kunstverein, Frankfurt am Mayn 1644, Seite 38. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Topographia_Bavariae_(Merian)_059.jpg&oldid=- (Version vom 1.8.2018)
_059.jpg&oldid=-){kind=link}
_059.jpg&oldid=3396453){kind=link}