an das CammerGericht appellirt wird: Die Burger aber können niergendts in der ersten Instantz / als vor dem Rath zu Regenspurg / verklagt werden. Vnd seynd auch die Geistliche allda / so wol als die Weltliche / was die conservation, vnnd protection, vnd das Politische Stattwesen / anbelanget / den Gesätzen der Statt vnterworfen. Anno 1525. begab sich die Clerisey allhie / in E. Ers. Raths Schutz / verwilligte das Vmbgeldt / Stewer / vnd Wacht / thaten Pflicht / vnnd wurden gleichsamb Burger / vbergaben ihre Privilegia, vnd zween VertragsBrieff / deß Weinschenckens halber. Vber 3. Jar wurde die Clerisey ihrer Pflicht / gegen zweyhundert fl. für das Vmbgeldt jährlich zu geben / wieder erlassen. Anno 1534. wurden den 4. Clöstern / als zum Predigern / S. Jacob / Augustinern / vnd Barfüssern / von E. E. Raths wegen 2. Pfleger gesetzt.
Es ist auch die Statt vor allen Commissionen, die treffen an / was sie wollen / befreyet. Ihr alter Anschlag ist gewesen / zu einem monatlichen einfachen Römerzug / 10. zu Roß / 50. zu Fuß / hat aber moderation vor diesem schon begehrt. Sie hat vor vndencklichen Jahren gemüntzet / hält deß Jars 3. Märckt / oder Kirchweyh / nemblich S. Erhard / S. Emeram / vnnd Weich S. Peter. Es seynd viel vornehme Adeliche / vnnd alte Geschlecht in dem Rath / vnd vnter der Burgerschafft / allhie / als die Flettacher / Lerchenfelder / Aichinger / Kreyssen / Portner / Dimpffel / Ederer / Schwäbel / Beyhel / Adler / Hueber / Schiltl / Memminger / Reuthmar / Hamman / Marchthaler / Wolffen / Widman / etc.
Nun / in dieser Statt hat sich viel denckwürdiges zugetragen / davon etwas hieoben allbereyt gesagt worden: Das ander / vnnd vornembste folget hernach. Vnnd erstlich zwar wollen Theils / daß Anno 508. Hertzog Dieth in Bäyern / noch ein Heyd / dise Statt / so damals Römisch war / erobert / verbrennt / alles verhergt / vnd sie auff ein newes wieder gebawt habe. Etliche referirens ins 510. Jahr: Etliche zweifflen gar daran / vnd wollen von keinem Exempel wissen / daß die Bojer jemals wider die Christen sollten gewütet haben. Vnnd finden wir / daß der Münch Christophorus bey S. Emeran / an seinen Abbt Ambrosium, in dem Büchlein / von den verbannten Juden / schreibet / daß es ein alt WeyberGedicht seye / daß Käyser Carl der Grosse / nahendt der Regenspurgischen StattMawer / ein grosse Schlacht wider die Vnglaubigen gehalten habe / (als wie man im Jahr 780. geschehen zu seyn vorgibet) dieweil langst zuvor / allhie / vnd in gantz Bäyerland / die Christliche Religion / durch den Heil. Eustochium, vnd folgender Zeit / durch S. Ruprechten / vnter dem Hertzog in Bäyern Diethen dem Dritten / eingeführt worden; wiewol etliche seyen / so deß BäyerLands Bekehrung / dem Britannischen König Licio, vmbs Jahr Christi 182. zu schreiben. Besagter Käyser Carl solle diese der Bäyern Hauptstatt / mit vielen Freyheiten / vnd Gnaden / begabet / An. 792. ein ReichsTag / vnnd Concilium, allhie gehalten haben. Anno 868. war widerumb allhie ein ReichsTag. Anno 891. verbrann ein grosser Theil der Statt / ja / wie einer schreibt / solche gantz vnd gar / mit allen Kirchen / ausserhalb S. Cassian / vnnd S. Emeran / welche / wie Hondius vnd Brunnerus wollen / geblieben seyn. Anno 911. verbrandten die Vngarn die Vorstätte allhie. Anno 916. hielt Käyser Conrad der Erste da einen ReichsTag / verjagte Hertzog Arnolphen / vnnd vbergab die Statt seinem Bruder Hertzog Eberharden / den doch Hertzog Arnolph / genandt der böse / wider vertrieben. Diese Hertzogen Arnolphi / (welchen Gewoldus vnd Brunnerus, wieder seine Feinde / vnd Lästerer / vertheydigen) Bildnuß stehet an S. Hemerans Thorthüren aussen; welcher dieselbe Gegend der Stattmawren mit Thürnen / wider die Vngarn / bevestiget hat. Anno 955. war der Vngar König / mit 4. Hauptleuten / auß der Schlacht bey Augspurg gehalten / hieher / zu Herzog Heinrichen / gefangen gebracht / der sie vor dem OsterThor an einen Galgen hencken ließ; so zun Zeiten Käyser Otten deß Ersten geschehen / zu welchen auch Regenspurg zweymaln / (vnd zwar das letztemal Anno 955. durch Hunger) erobert / vnd einsmals Anno 954. schier gar verbrandt / Arnolph von Scheyern erlegt vnnd vmbgebracht / vnnd deß Käysers Bruder Hertzog
Matthäus Merian: Topographia Bavariae. Frankfurter Kunstverein, Frankfurt am Mayn 1644, Seite 85. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Topographia_Bavariae_(Merian)_153.jpg&oldid=- (Version vom 7.1.2019)
_153.jpg&oldid=-){kind=link}
_153.jpg&oldid=3473150){kind=link}